عليکم‌السلام شهريار آغا!      

چوخداندي قاچميشدين بيزدن اوزاغا

آياق باسمازدين بيزيم قوناغا

جوانليق دوريندن بو چاغادان(؟)

سن هئچ بيزدن ياد ائتمزدين

نه اولدو آي اوغول سن بيردن بيره

اونوتدوغون ائلي سالدين خاطره؟

چاغلايان سولارا، اسن يئللره

بو قوجا حيدره ائيله‌دين سلام؟

لطفون آرتيق اولسون عليک‌السلام

نه قدر دادلي ايميش سنين بو ديلين

ائشيدن کيمي بو سسيني ائلين

قوجا، جوان، اوشاق، قيز گلين

سني دينله‌مگه قاچديلار چؤله

آنام قوربان اولسون بو شيرين ديله

فارس قيزلار آزديرميشدي عملين؟

کي فارسجايدي بوتون شعرين غزلين؟

حيدربابا يوردوندا بير گؤزلين

عشقينه بير قلم قويمازدين بئله

فارسيجا يازماقدان دويمازدين بئله

تهران گؤزللري يولونو کج ائتدي

کؤنلونو آپاريب سني گيج ائتدي

دئه گؤروم يا فلک سنله لج ائتدي

دؤنگه وارميش دؤنوم وارميش بيلمه‌دين

آيريليق اؤلوم وارميش بيلمه‌دين

ايندي بيزي تازه گليب تاپيرسان

کؤنلوموزه کؤزلر قويوب ياخيرسان

حسرت ايله کئچنلره باخيرسان

گؤرورسن کي سولار آخيب گئديرميش

دوغولان قوجاليب اؤلوب ايتيرميش

چوخدا وئرمه، سيخينتي اؤز گؤنلونه

مهربان‌دير هر آتا اؤز اوغلونا

قاييتميسان ايندي کي سن يولونا

بويور گلين گؤز اوستونده يئرين وار

ائلين سني سئوينج ايله قارشيلار

سلام ائيلر بوتون ائليميز سنه

باغچاميز، باغيميز، گولوموز سنه

اوزون مدت سوسان ديليميز سنه

دي گؤرک دئمه‌لي داها نه‌يين وار؟

افسوس کي سن گئج ديل آچدين شهريار

کيچيک اوشاق تزه ديله گلنده

آيري بير دادليليق اولار ديلينده

لذتي وار آغلاياندا گولنده

ايندي کي ديل آچدين سوسما، آغلا، گول

يامان سؤيله ياخشي سؤيله داغلا گول